Чинот во кој се соединуваат две души секогаш побудува милост, веселба и желба за благодат, а во Македонија речиси неизбежно мора да биде проследен со големо славје. Па така, еден од најубавите културни настани што ја обележуваат богатата македонска традиција е токму еден ваков настан – Галичката свадба.
Свадбите во ова село традиционално се одржувале на Петровден (12 јули). Поради желбата на галичаните да ги зачуваат од заборав овие карактеристични обичаи, почнувајќи од 1963 година, секоја година на Петровден се одржува манифестација во селото Галичник, во која со оригиналните свадбарски обичаи и ритуали се венчаваат невестата и младоженецот. Секоја година се бира еден пар, кој достоинствено и гордо станува дел од оваа прочуена свадба.
За време на церемонијата планините одекнуваат од ударот на тапаните и од писокот на зурлите, се пеат изворни песни и се играат познати ора, меѓу кои и најубавото македонско оро – Тешкото. Убавината на свадбата ја дополнуваат и традиционалните носии на младоженецот и на свадбарите, како и прочуената и познатата галичка носија на невестата, изработена со филигранска прецизност и точност на терзиите. Овие носии најчесто се оставени во наследство.
Бидете и вие дел од една од најпрочуените свадби, проследена со специфични и архаични обичаи, каква што нема на друго место.