Брајчино

Никогаш нема да дознаете колку кристално чист, свеж и лесен може да биде воздухот сѐ додека не го посетите многувековното село Брајчино. Се сместувате во пазувите на планината Баба, на надморска висина од 1000 метри, покрај долината на бистрата Брајчинска река. Околу вас се простира шумата и срамежливиот разнолик животински свет скриен во неа. Над вас се издигнуваат неколку планински врвови, а од недалеку погледот ви го наситува спокојното синило на Преспанското Езеро.

Вдишувате и ги полните градите со опојниот мирис на шумските плодови, ја запознавате прекрасната околина преку пешачките, планинските и велосипедските патеки и сфаќате дека сте дојдени на местото каде што и тишината мирува. Чувствувате слобода каква што може единствено да ја разберат птиците-преселници, кои секоја година го одбираат Брајчино како попатна станица за одмор и за храна. Селото изобилува со извори и брзи водотеци. Во Брајчинска Река плива еден од најстарите видови пастрмка, а еловата шума има најголем процент на прираст на годишно ниво во Европа.

 

 

Старите селски куќи ги краси автентична архитектура, која потекнува од 19 век, но има и многу модерни домови. Многумина знаат да речат дека Брајчино е урбано село во поглед на стилот на живеење и изгледот на некои од градбите. Тоа не треба ни да зачудува, со оглед на тоа што на почетокот на 20 век во ова село и во околните се одржувале балови.

За крај од долгата прошетка неизбежно е да се засладите од неодоливо вкусниот мармалад, слатко или компот пoдготвени од жителите на селото, а може и да си ја затоплите душата со неколку голтки од уникатниот ликер од шумско овошје.

Promote your Service

Accomodation

Add up to 3 images.

Validation code:
Enter the code above here :

Can't read the image? click here to refresh.